Morphologie (Linguistik)

Under Morfologii (vom griechische μορφή, morphé, „Gstalt, Form“, und λόγος, lógos, „Wort, Leer, Vernumft“), au: Morfematik oder Morfemik, verstoot mä in dr Sproochwüsseschaft e Däilgebiet vo dr Grammatik. D Morfologii befasst sich mit dr innere Struktuur vo Wörter und erforscht die chlinste Elimänt von ere Sprooch, won e Bedütig und/oder e Funkzioon häi: d Morfeem. Wäge däm wird d Morfologii au as „Wortgrammatik“ bezeichnet, so wie mä dr Süntax au „Satzgrammatik“ säit.

D Darstellig vo dr Morfologii häisst in dr dradizionelle Grammatik «Formeleer». Si goot vom Wort us und analisiert d Flexionsforme, d Wortbildig und d Wortarte. Doodrbii goots um d Biegig vom Wort (woo hänggt me wenn weli Ändig aa oder woo duuscht me wele Vokaal uus?), um Wortabläitige (wie macht me us eme Substantiv e Verb oder us eme Verb e Substantiv oder us eme Adjektiv e Verb?) und um Wortzämesetzige (hänggt me d Wörter äifach zäme oder bruuchts en Bindeluut dezwüsche?).